Omni Bus Fare: பண்டிகை கால பயணிகளுக்கு ஹேப்பி நியூஸ்! ஆம்னி பேருந்துகளில் அதிக கட்டணத்துக்கு

Omni Bus Fare: பண்டிகை கால பயணிகளுக்கு ஹேப்பி நியூஸ்! ஆம்னி பேருந்துகளில் அதிக கட்டணத்துக்கு செக்!

Tamil Nadu Omni Bus: "ஆம்னி பேருந்துகளுக்கு செக், தமிழகம் முழுவதும் 30 சிறப்பு தனிப்படைகள், விதிமீறினால் கடும் நடவடிக்கை என எச்சரிக்கும் அரசு."

Tamil Nadu Omni Bus Rules: தமிழகத்தில் பண்டிகைக் காலங்கள் மற்றும் தொடர் விடுமுறை நாட்களில் ஆம்னி பேருந்துகளில் பயணம் செய்யும் பயணிகளின் எண்ணிக்கை வழக்கத்தை விட அதிகரிப்பது வழக்கம். குறிப்பாக, வரும் அக்டோபர் 2-ம் தேதி காந்தி ஜெயந்தி, அக்டோபர் 19-ம் தேதி ஆயுத பூஜை மற்றும் நவம்பர் 8-ம் தேதி தீபாவளி உள்ளிட்ட பண்டிகை மற்றும் தொடர் விடுமுறை காலங்களில் சொந்த ஊர்களுக்கு செல்லும் பொதுமக்களின் எண்ணிக்கை அதிகமாக இருக்கும் என எதிர்பார்க்கப்படுகிறது. இந்தக் காலகட்டத்தில் பயணிகளின் தேவையைப் பயன்படுத்தி சில ஆம்னி பேருந்துகள் விதிமீறல்களில் ஈடுபடுவதைத் தடுக்க போக்குவரத்துத் துறை சார்பில் தீவிர கண்காணிப்பு நடவடிக்கைகள் மேற்கொள்ளப்பட உள்ளன.

பண்டிகைக் காலங்களில் பயணிகள் கூட்டம் அதிகரிக்கும் நேரங்களில் சில தனியார் ஆம்னி பேருந்துகளில் வழக்கத்தைவிட அதிக கட்டணம் வசூலிக்கப்படுவதாக புகார்கள் எழுவது உண்டு. இதுபோன்ற முறைகேடுகளை கட்டுப்படுத்துவதுடன், பயணிகளிடம் சட்டவிரோதமாக கூடுதல் கட்டணம் வசூலிக்கப்படுகிறதா என்பதையும் அதிகாரிகள் தீவிரமாக கண்காணிக்க உள்ளனர். பயணிகளின் அவசர தேவையைப் பயன்படுத்தி கட்டண விதிமுறைகளை மீறினால் சம்பந்தப்பட்ட பேருந்து மீது நடவடிக்கை எடுக்கப்படும் என தெரிவிக்கப்பட்டுள்ளது.

ஆம்னி பேருந்துகளின் விதிமீறல்களை கண்காணிப்பதற்காக தமிழகம் முழுவதும் 30-க்கும் மேற்பட்ட சிறப்பு தீவிர கண்காணிப்புக் குழுக்கள் அமைக்கப்பட உள்ளன. ஒவ்வொரு குழுவிலும் ஒரு வட்டாரப் போக்குவரத்து அலுவலர் (RTO) உள்ளிட்ட மூன்று அலுவலர்கள் இடம்பெறுவார்கள். இந்தக் குழுக்கள் முக்கிய நெடுஞ்சாலைகள், பேருந்து நிலையங்கள் மற்றும் ஆம்னி பேருந்துகள் அதிகளவில் இயக்கப்படும் பகுதிகளில் திடீர் சோதனைகளை மேற்கொள்ளும்.

சிறப்பு குழுக்களின் ஆய்வின்போது பேருந்துகளின் முறையான ‘பர்மிட்’ உள்ளிட்ட ஆவணங்கள் சரிபார்க்கப்படும். உரிய அனுமதி இல்லாமல் பேருந்துகள் இயக்கப்படுகிறதா, செலுத்த வேண்டிய வாகன வரிகள் நிலுவையில் உள்ளதா என்பதும் ஆய்வு செய்யப்படும். அதேபோல், பேருந்துகளில் அனுமதிக்கப்பட்ட அளவைவிட கூடுதல் சுமைகள் ஏற்றிச் செல்லப்படுகிறதா என்பதையும் அதிகாரிகள் கண்காணிக்க உள்ளனர்.

சோதனைகளின்போது விதிமீறல்கள் கண்டறியப்பட்டால் சம்பந்தப்பட்ட ஆம்னி பேருந்துகளுக்கு உடனடியாக அபராதம் விதிக்கப்படும். விதிமீறலின் தன்மை மற்றும் தீவிரத்தைப் பொறுத்து கூடுதல் சட்ட நடவடிக்கைகளும் மேற்கொள்ளப்படலாம். குறிப்பாக, முறையான அனுமதி இல்லாமல் இயக்கப்படும் பேருந்துகள் மற்றும் தொடர் விதிமீறல்களில் ஈடுபடும் வாகனங்களுக்கு கடுமையான நடவடிக்கை எடுக்கப்படும் என போக்குவரத்துத் துறை சார்பில் எச்சரிக்கை விடுக்கப்பட்டுள்ளது.

பண்டிகை நாட்களில் பொதுமக்கள் அதிகளவில் பயணம் செய்யும் நிலையில், ஆம்னி பேருந்துகளின் இயக்கம் முறையாக இருப்பதை உறுதி செய்வதும், பயணிகளிடம் விதிமுறைகளுக்கு மாறாக கட்டணம் வசூலிக்கப்படுவதைத் தடுப்பதும் இந்த நடவடிக்கையின் முக்கிய நோக்கமாக உள்ளது. தொடர் விடுமுறை நாட்களை முன்னிட்டு சிறப்பு கண்காணிப்புக் குழுக்கள் களத்தில் இறங்குவதால், ஆம்னி பேருந்துகளின் விதிமீறல்கள் கட்டுப்படுத்தப்படும் என எதிர்பார்க்கப்படுகிறது.

தலைப்பு செய்திகள்

ஃபோட்டோ கேலரி