மும்மொழிக் கட்டாயம் ? சி.பி.எஸ்.இ.

மும்மொழிக் கட்டாயம் ? சி.பி.எஸ்.இ.- க்கு உத்தரவிட்ட சுப்ரீம் கோர்ட் !

6-ம் வகுப்பு மாணவர்களுக்கான மும்மொழிக் கொள்கையை அடுத்த கல்வியாண்டு முதல் அமல்படுத்துவது குறித்து பரிசீலிக்க சி.பி.எஸ்.இ.க்கு சுப்ரீம் கோர்ட்டு அறிவுறுத்தியுள்ளது.

சி.பி.எஸ்.இ. பள்ளிகளில் 6-ம் வகுப்பு மாணவர்களுக்கு மும்மொழிக் கொள்கையை நடப்பு கல்வியாண்டிலேயே அமல்படுத்துவதற்கு பதிலாக, அடுத்த கல்வியாண்டு முதல் நடைமுறைப்படுத்துவது குறித்து பரிசீலிக்குமாறு சி.பி.எஸ்.இ. நிர்வாகத்திடம் சுப்ரீம் கோர்ட்டு கேட்டுக்கொண்டுள்ளது.

9-ம் வகுப்பில் 3 மொழிகள் கட்டாயம் :

சி.பி.எஸ்.இ. கடந்த மே மாதம் வெளியிட்ட சுற்றறிக்கையில், 9-ம் வகுப்பு மாணவர்கள் நடப்பு கல்வியாண்டு முதல் 3 மொழிகளைப் படிப்பது கட்டாயம் என அறிவித்திருந்தது. இதில் குறைந்தபட்சம் 2 மொழிகள் இந்திய மொழிகளாக இருக்க வேண்டும் என்றும் தெரிவிக்கப்பட்டிருந்தது.

இதன் தொடர்ச்சியாக, 6-ம் வகுப்பில் சேரும் மாணவர்களுக்கும் நடப்பு கல்வியாண்டு முதல் மும்மொழிக் கொள்கையை நடைமுறைப்படுத்தும் வகையில் அறிவுறுத்தல்கள் வழங்கப்பட்டிருந்தன. அதேநேரத்தில், 10-ம் வகுப்பில் 3-வது மொழிக்காக தனியாக பொதுத்தேர்வு நடத்தப்படாது என்றும் சி.பி.எஸ்.இ. தெரிவித்திருந்தது.

எதிர்ப்பு தெரிவித்து வழக்கு :

6-ம் வகுப்பு மாணவர்களிடம் நடப்பு கல்வியாண்டிலேயே 3 மொழிகளை கட்டாயமாக்கும் முடிவுக்கு எதிராக பெற்றோர் மற்றும் கல்வியாளர்கள் தரப்பில் சுப்ரீம் கோர்ட்டில் மனுக்கள் தாக்கல் செய்யப்பட்டன.

இந்த மனுக்களை விசாரணைக்கு எடுத்துக்கொண்ட நீதிமன்றம், மத்திய அரசு, சி.பி.எஸ்.இ. மற்றும் என்.சி.இ.ஆர்.டி. ஆகியவற்றுக்கு நோட்டீஸ் அனுப்பியிருந்தது.

மாணவர்களின் நலனை கருத்தில் கொள்ள வேண்டும் :

இந்த வழக்கு தலைமை நீதிபதி சூர்யகாந்த் தலைமையிலான அமர்வு முன்பு மீண்டும் விசாரணைக்கு வந்தது. நீதிபதிகள் ஜோய்மால்யா பக்சி மற்றும் வி.மோகனா ஆகியோரும் இடம்பெற்றிருந்த அமர்வு, மாணவர்களுக்கு ஏற்படும் சிரமங்களை கருத்தில் கொண்டு மும்மொழிக் கொள்கையை அமல்படுத்தும் காலக்கெடுவை மறுபரிசீலனை செய்யும் யோசனையை முன்வைத்தது.

குறிப்பாக, 6-ம் வகுப்பு மாணவர்களுக்கு மும்மொழிக் கொள்கையை அடுத்த கல்வியாண்டு முதல் அமல்படுத்துவது குறித்து சி.பி.எஸ்.இ. பரிசீலிக்க வேண்டும் என நீதிபதி ஜோய்மால்யா பக்சி தெரிவித்தார்.

விருப்பமுள்ள மாணவர்களுக்கு அனுமதி ?

அதேவேளையில், 6-ம் வகுப்பு மாணவர்களில் சிலர் நடப்பு கல்வியாண்டிலேயே 3 மொழிகளை கற்க விரும்பினால், அவர்களுக்கு அந்த வாய்ப்பை வழங்கலாம் என்றும் நீதிமன்றம் யோசனை தெரிவித்தது.

இதன் மூலம், அனைத்து மாணவர்களுக்கும் ஒரே நேரத்தில் கூடுதல் கல்விச்சுமையை ஏற்படுத்தாமல், விருப்பம் உள்ளவர்களுக்கு மும்மொழிக் கல்வியைத் தொடரும் வாய்ப்பை வழங்குவது குறித்து பரிசீலிக்கலாம் என்ற கருத்தை நீதிமன்றம் முன்வைத்துள்ளது.

புதிய அறிவிப்பு வெளியாகும் :

நீதிமன்றத்தின் இந்த யோசனை குறித்து சி.பி.எஸ்.இ. தரப்பில் ஆஜரான கூடுதல் சொலிசிட்டர் ஜெனரல் ஐஸ்வர்யா, சம்பந்தப்பட்ட அதிகாரிகளுடன் ஆலோசித்து உரிய முடிவு எடுக்கப்படும் என்றும், அதன் பின்னர் புதிய அறிவிப்பு வெளியிடப்படும் என்றும் தெரிவித்தார்.

இறுதி முடிவு பின்னர் :

விசாரணையின்போது, இரு தரப்பினரின் உரிமைகளுக்கும் பாதிப்பு ஏற்படாத வகையில் தங்களது கருத்துகளையும் யோசனைகளையும் மட்டுமே தெரிவித்துள்ளதாக நீதிபதிகள் குறிப்பிட்டனர்.

மேலும், மும்மொழிக் கொள்கை தொடர்பான முக்கிய சட்ட மற்றும் நிர்வாக விவகாரங்கள் குறித்து பின்னர் விரிவாக முடிவு எடுக்கப்படும் என்றும் நீதிமன்றம் தெரிவித்துள்ளது.

இதனால், 6-ம் வகுப்பு மாணவர்களுக்கான மும்மொழிக் கொள்கை நடப்பு கல்வியாண்டிலேயே கட்டாயமாகுமா அல்லது அடுத்த கல்வியாண்டுக்கு தள்ளிப்போகுமா என்பது சி.பி.எஸ்.இ. வெளியிட உள்ள புதிய அறிவிப்பை பொறுத்தே அமையும் என எதிர்பார்க்கப்படுகிறது.