”திமுக ஆட்சியில் பாஜகவுடன் நெருக்கம்..”

”திமுக ஆட்சியில் பாஜகவுடன் நெருக்கம்..” - போட்டுடைத்த திருமா !

திமுகவின் கடந்தகால பாஜக உறவு, தற்போதைய அரசியல் நிலைப்பாடு குறித்து கருத்து தெரிவித்த திருமாவளவன், கூட்டணி அரசியலில் நம்பிக்கையே முக்கியம் என கூறினார்.

இந்தியாவின் பல்வேறு மாநிலங்களில் நடைபெறும் இடைத்தேர்தல்களில் பணத்தின் ஆதிக்கம் அதிகரித்து வருவதாகவும், வாக்காளர்களை பணம் கொடுத்து கவரும் நடைமுறை ஜனநாயகத்திற்கு அச்சுறுத்தலாக மாறி வருவதாகவும் விடுதலை சிறுத்தைகள் கட்சித் தலைவர் திருமாவளவன் தெரிவித்துள்ளார்.

திருச்சியில் செய்தியாளர்களை சந்தித்த அவர், இடைத்தேர்தல்களில் அதிக அளவில் பணம் செலவழித்து வாக்குகளை பெறும் முயற்சிகள் நடைபெறுவதாக குற்றம்சாட்டினார். தேர்தல் நேரத்தில் பண விநியோகம் போன்ற முறைகேடுகள் நடைபெறாமல் தடுக்க உரிய கண்காணிப்பு தேவை என்றும் அவர் வலியுறுத்தினார்.

பதவிக்காக உருவானது அல்ல.. திருமாவளவன் விளக்கம் :

திமுக - விசிக கூட்டணி குறித்து பேசிய திருமாவளவன், இந்த கூட்டணி குறுகிய அரசியல் காரணங்களுக்காக அமைக்கப்பட்ட ஒன்று அல்ல என தெரிவித்தார்.

“திமுக, விசிக கூட்டணி நீண்ட கால அரசியல் பயணத்தை கொண்டது. இந்த உறவு குறித்து முதல்வர் மு.க.ஸ்டாலின் உள்ளிட்ட திமுகவின் முன்னணி நிர்வாகிகளுக்கு நன்றாக தெரியும். ஆனால் சிலர் பதவிக்காக கூட்டணியை தேர்வு செய்ததாகவும், பதவி ஆசையால் இந்த முடிவு எடுக்கப்பட்டதாகவும் தவறான கருத்துகளை பரப்பி வருகின்றனர்” என கூறினார்.

மேலும், இதுபோன்ற விமர்சனங்கள் தனது தலைமை மீதான தாக்குதல் என்றும், திமுகவின் முக்கிய நிர்வாகிகளுடன் தொடர்ந்து இணைந்து செயல்பட்டு வருவதாகவும் திருமாவளவன் தெரிவித்தார்.

"திமுக பாஜகவுடன் உறவில் இருந்தது.." - திருமாவளவன் :

பாஜக எதிர்ப்பு நிலைப்பாடு குறித்து பேசிய திருமாவளவன், கடந்த கால அரசியல் நிகழ்வுகளை நினைவுகூர்ந்தார்.

“திமுக கூட்டணியில் இருந்த காலத்தில், பாஜகவுக்கு எதிராக விசிக தொடர்ந்து குரல் கொடுத்து வந்தது. ஆனால் திமுக அப்போது மத்திய அரசுடன் உறவில் இருந்தது. மத்திய அமைச்சர்கள் பங்கேற்ற நிகழ்ச்சிகளும் நடைபெற்றன. இருந்தபோதிலும் திமுக பாஜக எதிர்ப்பில் உறுதியாக இருக்கும் என்று நாங்கள் நம்பினோம்” என தெரிவித்தார்.

அதேபோல், தற்போது தமிழக வெற்றிக் கழகமும் பாஜக எதிர்ப்பு நிலைப்பாட்டில் உறுதியாக இருப்பதாக நம்புவதாக திருமாவளவன் கூறினார்.

கொள்கை அரசியலே முக்கியம் - திருமாவளவன் :

அரசியல் கூட்டணிகள் வெறும் தேர்தல் வெற்றி கணக்குகளுக்காக மட்டும் அமையக்கூடாது என்றும், கொள்கை மற்றும் மக்கள் நலன் சார்ந்த நிலைப்பாடுகளே முக்கியம் என்றும் திருமாவளவன் தெரிவித்தார்.

மேலும், தேர்தல்களில் பண பலத்தின் மூலம் மக்களின் முடிவுகளை மாற்றும் முயற்சிகள் தடுக்கப்பட வேண்டும் என்றும், ஜனநாயகத்தின் நம்பகத்தன்மையை பாதுகாக்க அனைத்து தரப்பினரும் பொறுப்புடன் செயல்பட வேண்டும் என்றும் அவர் கூறினார்.