ரோஹித்துடன் 3 முறை கோப்பை வென்ற மும்பை இந்தியன்ஸ் பயிற்சியாளர் மகிளா ஜெயவர்தனே பதவி விலகல்

ரோஹித்துடன் 3 முறை கோப்பை வென்ற மும்பை இந்தியன்ஸ் பயிற்சியாளர் மகிளா ஜெயவர்தனே பதவி விலகல்

மும்பை: மும்பை இந்தியன்ஸ் அணியின் தலைமைப் பயிற்சியாளர் பதவியிலிருந்து இலங்கை முன்னாள் கேப்டன் மகிளா ஜெயவர்தனே திடீரென விலகியுள்ளார். இதனை மும்பை இந்தியன்ஸ் அணி நிர்வாகம் சனிக்கிழமை காலை அதிகாரப்பூர்வமாக உறுதிப்படுத்தியது. மும்பை இந்தியன்ஸ் அணியின் வரலாற்றிலேயே மிகவும் வெற்றிகரமான பயிற்சியாளராக வலம் வந்த இவர், முன்னாள் கேப்டன் ரோஹித் சர்மாவுடன் இணைந்து 2017, 2019 மற்றும் 2020 ஆகிய 3 ஆண்டுகளில் ஐபிஎல் சாம்பியன் பட்டங்களை வென்று பிரம்மாண்ட சாதனை படைத்தவர் ஆவார்.

ஜெயவர்தனே மும்பை இந்தியன்ஸ் அணியுடன் இரண்டு வெவ்வேறு காலகட்டங்களில் தலைமைப் பயிற்சியாளராகப் பணியாற்றினார். முதல் முறையாக 2017 முதல் 2022 வரையிலும், பின்னர் 2024 முதல் 2026 வரையிலும் அவர் அணியை வழிநடத்தினார். ஒழுக்கம் மற்றும் ஒற்றுமையை அடிப்படையாகக் கொண்ட ஒரு சிறந்த கலாச்சாரத்தை அணிக்குள் விதைத்தார். இடையில் 2022-ல் மார்க் பவுச்சரிடம் தலைமைப் பொறுப்பை ஒப்படைத்த பிறகு, மும்பை இந்தியன்ஸ் குழுமத்தின் உலக அளவிலான செயல்திறன் தலைவராகச் செயல்பட்டார். அந்த நேரத்தில் மும்பை மகளிர் ஐபிஎல் அணி, எம்ஐ நியூயார்க் (மேஜர் லீக் கிரிக்கெட், அமெரிக்கா) மற்றும் எம்ஐ எமிரேட்ஸ் (ILT T20) ஆகிய 3 அணிகளும் சாம்பியன் பட்டம் வெல்ல ஜெயவர்தனேவின் வியூகங்களே காரணமாக அமைந்தன.

அவரது விலகல் குறித்து மும்பை இந்தியன்ஸ் அணியின் உரிமையாளர் நீதா அம்பானி நெகிழ்ச்சியுடன் அறிக்கை வெளியிட்டுள்ளார். "மும்பை இந்தியன்ஸ் அணியின் தொடர் வெற்றிப் பயணத்திற்கு ஜெயவர்தனே அளப்பரிய பங்களிப்பை வழங்கியுள்ளார். அவரது அமைதியான தலைமைத்துவம் மற்றும் நேர்மை அணிக்கு மிகப்பெரிய பலத்தைத் தந்தது. எங்களுடன் பகிர்ந்த அந்த அற்புதமான நினைவுகளை எப்போதுமே போற்றிப் பாதுகாப்போம். ஜெயவர்தனே எப்போதும் எங்கள் குடும்பத்தின் ஒரு அங்கமாகத் திகழ்வார்" என்று நீதா அம்பானி குறிப்பிட்டுள்ளார்.

பதவி விலகல் குறித்து பேசிய ஜெயவர்தனே, "மும்பை இந்தியன்ஸ் அணியுடனான எனது 10 ஆண்டு கால பயணம் என் வாழ்க்கையில் மிகவும் மதிப்புமிக்கது. வீரர்கள், ரசிகர்கள் மற்றும் நிர்வாகத்தின் அபார ஆதரவு என்னை நெகிழ வைத்தது. என் மீது தொடர்ச்சியாக முழு நம்பிக்கை வைத்த நீதா அம்பானி மற்றும் ஆகாஷ் அம்பானிக்கு எனது நெஞ்சார்ந்த நன்றி. ஒன்றாக இணைந்து சாதித்த பெருமையுடன் விடைபெறுகிறேன். மும்பை இந்தியன்ஸ் அணிக்கு எனது இதயத்தில் எப்போதும் தனி இடம் உண்டு" என்று உருக்கமாகக் கூறி விடைபெற்றார்.