ஜெம் வீரமணி பாலியல் வழக்கை அரசியலாக்க வேண்டாம்: சமூக பொறுப்போடு நடந்து கொள்ளுங்கள் என நீதிபதி அறிவுறுத்தல்
சென்னை: சிறுமிகள் சம்பந்தப்பட்ட ஜெம் வீரமணி பாலியல் வழக்கை இருதரப்பும் மாறி, மாறி ஒருவர் மீது ஒருவர் குற்றம் சாட்டி அரசியலாக்க வேண்டாம். அது குற்றவாளிகள் தப்பிக்க வழிவகுத்துவிடும். சமூக பொறுப்போடு அனைவரும் நடந்து கொள்ளுங்கள் என சென்னை உயர் நீதிமன்ற நீதிபதி கே.ஜி.திலகவதி அறிவுறுத்தியுள்ளார்.
சிறுமிகளை பாலியல் வன்கொடுமை செய்ததாக ஜெம் கிரானைட் வீரமணிக்கு எதிரான வழக்கில் உரிய நடவடிக்கை எடுக்காமல் முந்தைய திமுக அரசு குற்றவாளிகளை தப்பிக்க விட்டுவிட்டதாக தமிழக அமைச்சர்கள் நிர்மல்குமார் மற்றும் ஆதவ் அர்ஜூனா ஆகியோர் கருத்து தெரிவித்திருந்தனர். இதேபோல தவெக தகவல் தொழில்நுட்ப பிரிவும், திமுக அரசுக்கு எதிராக குற்றம் சாட்டி தனது சமூக வலைதளப்பக்கத்தில் பதிவிட்டிருந்தது.
தவெக அமைச்சர்களின் இந்த செயல், திமுகவுக்கு களங்கம் ஏற்படுத்தும் வகையில் உள்ளது என்றும், வீரமணிக்கு எதிரான பாலியல் வன்கொடுமை வழக்கில் முந்தைய திமுக அரசு மீது குற்றம் சாட்டி எந்தவொரு கருத்துக்களையும் தெரிவிக்கக்கூடாது என அமைச்சர்கள் நிர்மல்குமார், ஆதவ் அர்ஜூனா மற்றும் தவெக தகவல் தொழில்நுட்ப பிரிவுக்கு தடை விதிக்கக்கோரி திமுக பொதுச் செயலாளரும், முன்னாள் அமைச்சருமான துரைமுருகன் தரப்பில் சென்னை உயர் நீதிமன்றத்தில் வழக்கு தொடரப்பட்டது.
அதில், ஜெம் வீரமணிக்கு எதிராக கடந்த 2025 அக்.6 அன்று புகார் வந்த மறுநாளே திமுக ஆட்சியில் வழக்குப்பதிவு செய்யப்பட்டது. எந்த தலையீடும் இல்லாமல், தாமதமின்றி நடவடிக்கை எடுக்கப்பட்டுள்ளது. உண்மை நிலைக்கு மாறாக திமுகவுக்கு களங்கம் ஏற்படுத்தும் வகையில் அமைச்சர்கள் மற்றும் ஆளுங்கட்சியின் தகவல் தொழில்நுட்ப பிரிவு அவதூறான கருத்துக்களை பரப்பி வருகிறது.
எனவே தவெக அமைச்சர்களின் இந்த செயலுக்காக ரூ. ஒரு கோடியே ஒரு லட்சத்தை மான நஷ்டஈடாக திமுகவுக்கு வழங்க அமைச்சர்கள் நிர்மல்குமார் மற்றும் ஆதவ் அர்ஜூனா, தவெக தகவல் தொழில்நுட்ப பிரிவுக்கு உத்தரவிட வேண்டும். அத்துடன் இதுதொடர்பாக திமுக மீது குற்றம் சாட்டி வெளியிடப்பட்டுள்ள பதிவுகள் மற்றும் வீடியோக்களை நீக்க தவெகவுக்கும், சமூக வலைதள நிறுவனங்களுக்கும் உத்தரவிட வேண்டும், எனக் கோரியிருந்தார்.
இந்த வழக்கு நீதிபதி கே.ஜி.திலகவதி முன்பாக நேற்று விசாரணைக்கு வந்தது. அப்போது திமுக தரப்பில் மூத்த வழக்கறிஞர் ஜெ.ரவீந்திரன் ஆஜராகி, இதுதொடர்பாக சம்பந்தப்பட்ட மெட்டா, யூடியூப், எக்ஸ் ஆகிய சமூக வலைதள நிறுவனங்களுக்கு எதிராக வழக்குத்தொடர அனுமதி வழங்க வேண்டுமென்றார்.
தமிழக அமைச்சர்கள் தரப்பில் ஆஜரான அரசு தலைமை வழக்கறிஞர் விஜய் நாராயண், அமைச்சர்களுக்கு எதிராக வழக்கு தொடர வேண்டுமென்றால் முன்கூட்டியே நோட்டீஸ் வழங்கியிருக்க வேண்டும். இந்த வழக்கு சமூக வலைதளப்பதிவுகளை அடிப்படையாக கொண்டது. எனவே இந்த வழக்கு விசாரணைக்கு உகந்தது அல்ல என்பதால் தள்ளுபடி செய்ய வேண்டும், என்றார்.
அதையடுத்து நீதிபதி, இந்த வழக்கு தொடர்பாக சம்பந்தப்பட்ட அமைச்சர்கள், தவெக தொழில்நுட்ப பிரிவு, சமூக வலைதள நிறுவனங்கள் உள்ளிட்டோர் தரப்பில் பதிலளிக்க உத்தரவிட்டு விசாரணையை வரும் செப்.28-க்கு தள்ளி வைத்தார்.
அப்போது நீதிபதி கே.ஜி.திலகவதி, “சிறுமிகள் சம்பந்தப்பட்ட இந்த ஜெம் வீரமணி தொடர்பான வழக்கை நாளிதழ்களில் படிக்கும்போதே மனம் பதறுகிறது. இந்த வழக்கு மிகவும் தீவிரமானது. பாதிக்கப்பட்ட சிறுமிகள் பாதுகாக்கப்பட வேண்டும். அனைவருக்கும் சமூக பொறுப்பு உள்ளது. இந்த விவகாரத்தை இருதரப்பும் மாறி, மாறி ஒருவர் மீது ஒருவர் குற்றம் சாட்டி அரசியலாக்க வேண்டாம். அது வழக்கை நீர்த்துப்போகச் செய்து குற்றவாளிகள் தப்பிக்க வழிவகுத்து விடும். எனவே இருதரப்பும் இந்த விவகாரத்தை இத்துடன் நிறுத்திக் கொள்ளுங்கள். அரசு தலைமை வழக்கறிஞரும், திமுக தரப்பு மூத்த வழக்கறிஞரும் உங்களது தரப்பினருக்கு இதுதொடர்பாக அறிவுறுத்துங்கள். இது என்னுடைய தனிப்பட்ட கருத்து” என்று தெரிவித்தார்.