IND vs NZ: இந்த 2 இந்திய வீரர்கள் தான் நியூசிலாந்து டெஸ்டில் கவனிக்க வேண்டியவர்கள்.. போல்ட் கருத்து

IND vs NZ: இந்த 2 இந்திய வீரர்கள் தான் நியூசிலாந்து டெஸ்டில் கவனிக்க வேண்டியவர்கள்.. போல்ட் கருத்து

மும்பை: நியூசிலாந்தில் நடைபெறவுள்ள இரண்டு போட்டிகள் கொண்ட தொடரில் இந்திய அணி விளையாட உள்ளது. இது வரும் நவம்பர் 19 அன்று தொடங்குகிறது. இந்தத் தொடரில் இந்திய அணியில் மிக கவனிக்க வேண்டிய முக்கிய பேட்டர்களில் ஒருவராக கே.எல். ராகுல் இருப்பார் என்று நியூசிலாந்தின் முன்னாள் வேகப்பந்து வீச்சாளர் டிரென்ட் போல்ட் நம்பிக்கை தெரிவித்துள்ளார்.

உலக டெஸ்ட் சாம்பியன்ஷிப் இறுதிப் போட்டிக்கு தகுதிபெறும் வாய்ப்பை தக்க வைத்துக் கொள்ள இந்திய அணிக்கு நியூசிலாந்து தொடரில் வெற்றி தேவைப்படும் நிலையில், கேப்டன் ஷுப்மன் கில் மற்றும் முன்னணி வேகப்பந்து வீச்சாளர் ஜஸ்பிரித் பும்ரா உள்ளிட்ட பல முக்கிய வீரர்கள் மீது அனைவரின் கவனமும் திரும்பியுள்ளது.

இருப்பினும், இந்திய பேட்டர்களில் கே.எல். ராகுல் மற்றும் அவரது தொடக்க ஆட்டக்காரரான யஷஸ்வி ஜெய்ஸ்வால் ஆகிய இருவரின் ஆட்டத்தையும் காண தான் மிகவும் ஆவலுடன் காத்திருப்பதாக போல்ட் குறிப்பிட்டுள்ளார்.

இது குறித்து பேசிய அவர், "நான் எப்போதும் கே.எல். ராகுல் மற்றும் அவரது பேட்டிங் பாணியின் மிகப்பெரிய ரசிகன். இந்திய அணியின் முன்வரிசை பேட்டிங்கில் அவர் ஒரு மிகச்சிறந்த வீரர். மேலும், ஜெய்ஸ்வாலும் அணியில் இருக்கிறார். தரமான இரண்டு பேட்டர்களின் ஆட்டத்தைப் பார்ப்பது மிகவும் சுவாரஸ்யமாக இருக்கும்," என்று கூறினார்.

இந்தத் தொடர் நடைபெறும் வாரம் அங்குள்ள சூழ்நிலையை மிகவும் சுவாரஸ்யமாக்கலாம். வழக்கமாக பிப்ரவரி-மார்ச் மாதங்களில் நடைபெறும் இந்தியாவின் முந்தைய நியூசிலாந்து டெஸ்ட் சுற்றுப்பயணங்களை போலல்லாமல், இந்தத் தொடர் அக்டோபர் இறுதி மற்றும் நவம்பர் மாதங்களில் நடைபெறவுள்ளது.

இதனை சுட்டிக்காட்டி பேசிய போல்ட், "இந்திய அணி நியூசிலாந்திற்கு வந்து டெஸ்ட் கிரிக்கெட் விளையாடும் வாய்ப்பு எப்போதும் ஒரு உற்சாகமான தருணமாகும். ஆனால் தற்போதைய சூழலில், போட்டி அக்டோபர் இறுதியில் நடைபெறுகிறது. குளிர் காலம் இப்போது தான் முடிவடைந்திருக்கும் என நினைக்கிறேன். எனவே, வானிலை மிகவும் குளிராக இருக்க வாய்ப்புள்ளது."

"எங்களது பந்துவீச்சாளர்களுக்கு சாதகமாக ஆடுகளங்களில் ஓரளவாவது புற்கள் இருக்கும் என்று நம்புகிறேன். இது ஒரு சிறந்த தொடராக இருக்கும் என்பதில் எனக்கு சந்தேகமில்லை. எங்கள் அணியின் பந்துவீச்சு மிகவும் சமபலத்துடனும் சிறப்பாகவும் உள்ளது என்று நான் நினைக்கிறேன். வில் ஓ'ரூக் மூலம் சிறந்த வேகம் கிடைக்கிறது."

"கைல் ஜாமிசனின் ஸ்விங் மற்றும் மேட் ஹென்றியின் துல்லியமான பவுன்ஸ் ஆகியவை அணிக்கு கூடுதல் பலம் சேர்க்கின்றன. நானும், டிம் சவுதியும், நீல் வாக்னரும் இத்தனை வருடங்கள் பந்துவீசிய விதம் தனித்துவமானது. ஆனால், எங்கள் இளம் பந்துவீச்சாளர்கள் தங்களின் சொந்த பலம் மற்றும் வியூகங்களைப் பின்பற்றி செயல்பட நல்ல வாய்ப்புகள் உள்ளன," என்றும் போல்ட் கூறினார்.