வெற்றிப் பயணம் திட்டம் அமலுக்கு வந்தது: அரசுப் பேருந்துகளில் பெண்கள் இலவசமாக பயணிக்கலாம்
கோயம்பேடு பேருந்து முனையத்தில் ‘வெற்றிப் பயணம்’ திட்டத்தை முதல்வர் விஜய் தொடங்கி வைத்து, மகளிருக்கு பயணச்சீட்டு வழங்கினார். இதில் அமைச்சர் விஜய் தமிழன் பார்த்திபன், துறை செயலர் இல.நிர்மல்ராஜ் மற்றும் அரசு உயர் அதிகாரிகள் பங்கேற்றனர்.
சென்னை: தமிழகம் முழுவதும் அரசுப் பேருந்துகளில் பெண்கள் இலவசமாக பயணம் செய்யும் வெற்றிப் பயண திட்டத்தை முதல்வர் விஜய் நேற்று சென்னையில் தொடங்கி வைத்தார்.
அனைத்து அரசு பேருந்துகளிலும் பெண்கள் இலவசமாக பயணிக்கும் திட்டம் செயல்படுத்தப்படும் என தவெக தேர்தல் வாக்குறுதி அளித்திருந்தது. அந்த வகையில் மகளிர் கட்டணமில்லாப் பயணத் திட்டத்தை விரிவுபடுத்தி, ‘வெற்றிப் பயணம்’ என்ற பெயரில் அக்.2-ம் தேதி முதல் செயல்படுத்தப்படும் என்று கடந்த ஆக.24-ம் தேதி சட்டப்பேரவையில் விதி எண் 110-ன் கீழ் முதல்வர் விஜய் அறிவித்தார்.
இந்நிலையில், வெற்றிப் பயணம் திட்டத்தின் தொடக்க விழா சென்னை கோயம்பேடு பேருந்து முனையத்தில் நேற்று நடைபெற்றது. திட்டத்தை தொடங்கி வைத்த முதல்வர் விஜய், சென்னையிலிருந்து காஞ்சிபுரம் செல்லும் விழுப்புரம் கோட்டத்தின் புறநகர் சாதாரணப் பேருந்தில் இருந்த பெண் பயணிகளுக்கு டிக்கெட்டுகளை வழங்கினார். ஒவ்வொரு பயணியிடமும் எங்கே செல்ல வேண்டும் எனக் கேட்டு டிக்கெட்டுகளை வழங்கினார். மேலும் 2 பேருந்துகளில் ஏறிய முதல்வர் பயணிகளுக்கு வணக்கம் தெரிவித்தார்.
இந்த திட்டத்தில் தமிழகத்திலுள்ள 7 போக்குவரத்துக் கழகங்களின் மாநகர், நகர்ப்புற சாதாரணப் பேருந்துகள் மற்றும் மலைப்பகுதிகளில் 40 கி.மீ. வரை மட்டுமே மகளிர் கட்டணமின்றிப் பயணம் செய்து வந்த நிலையில், இத்திட்டத்தை விரிவாக்கம் செய்து மாநகர, நகரப் பகுதிகளில் இயங்கும் விரைவு, எல்எஸ்எஸ், டீலக்ஸ் அரசுப் பேருந்துகள், புறநகர் சாதாரணப்பேருந்துகள் (மொபசல்), 40 கிமீ-க்கு மேற்பட்ட மலைப்பகுதி சாதாரணப் பேருந்துகள் ஆகியவற்றிற்கும் விரிவு படுத்தப்பட்டு, மொத்தமாக 12,695 பேருந்துகளில் மகளிர் கட்டணமில்லாமல் பயணம் மேற்கொள்ள வழிவகை செய்யப்பட்டுள்ளது.
இத்திட்டத்தால், மாணவிகள் தொலைதூரத்தில் உள்ள கல்லூரிகளுக்குச் செல்லவும், மகளிர் மற்றும் திருநர் தங்கள் பணியிடங்களுக்குச் செல்லவும், மருத்துவம் மற்றும் அத்தியாவசியத் தேவைகளுக்கும் கட்டணமின்றிப் பேருந்துகளில் பயணிக்க இயலும். வெற்றி பயணத் திட்டத்தை செயல்படுத்துவது மூலம் போக்குவரத்து கழகங்களுக்கு ஏற்படும் நிதி இழப்பை அரசு ஈடு செய்யும் என அரசு தரப்பில் தெரிவிக்கப்பட்டுள்ளது. மேலும் பேருந்துகளை பெண்கள் எளிதில் அடையாளம் காண டிஜிட்டல் பலகைகளில் வெற்றி பயணம் என குறிப்படிப்பட்டிருக்கும் என அதிகாரிகள் தெரிவித்தனர்.
இந்நிகழ்வில், போக்குவரத்துத் துறை அமைச்சர் ஆ.விஜய் தமிழன் பார்த்திபன், அரசு தலைமைக் கொறடா ரா.சபரிநாதன், தலைமைச் செயலர் மு.சாய்குமார், போக்குவரத்துத் துறை செயலர் இல.நிர்மல்ராஜ், சென்னை மாநகர் போக்குவரத்துக் கழக மேலாண் இயக்குநர் வீ.ப.ஜெயசீலன் மற்றும் அரசு உயர் அலுவலர்கள் கலந்து கொண்டனர்.
சாக்லெட் கொடுத்த பெண்: பேருந்தில் முதல்வர் விஜய் டிக்கெட் கொடுத்தபோது, பெண்கள் அவருக்கு கை கொடுத்து வாழ்த்தினர். டிக்கெட் பெற்றபின் பெண் ஒருவர் முதல்வருக்கு சாக்லெட் கொடுத்தார். மேலும் வெற்றிப் பயண திட்டத்தை தொடங்கி வைத்ததற்கு நன்றியை தெரிவித்தனர்.
காந்தி ஜெயந்தியை முன்னிட்டு தமிழக மக்கள் கதர் ஆடைகளை அணிய வேண்டும் என முதல்வர் வேண்டுகோள் விடுத்திருந்தார். இதன்படி இந்த நிகழ்ச்சிக்கு முதல்வர் கதர் வேட்டி- சட்டை அணிந்து வந்திருந்தார். அங்கு அலங்கரித்து வைக்கப்பட்டிருந்த காந்தி படத்துக்கு மலர் தூவி மரியாதை செலுத்தினார்.
செங்கை, திருப்பூர் மாவட்டங்களில் தேர்தலால் தள்ளிப்போன திட்டம்: மதுராந்தகம், தாராபுரம் தொகுதிகளில் இடைத்தேர்தல் நடைபெறுவதால் தேர்தல் நடத்தை விதிகள் காரணமாக செங்கல்பட்டு மற்றும் திருப்பூர் மாவட்டங்களில் இத்திட்டம் நடைமுறைப்படுத்தப்படாது. தேர்தல் நடைமுறை முடிவுக்கு வந்த பிறகே இங்கு அமலாகும் என தெரிவிக்கப்பட்டுள்ளது.
இதனிடையே செங்கல்பட்டு மாவட்டத்துக்குட்பட்ட பகுதிகளில் மாநகர் போக்குவரத்து கழகப் பேருந்து களில் பெண்கள் டிக்கெட் எடுக்க மறுத்துள்ளனர். நடத்துநர்கள் அவர்களிடம் தேர்தல் நடைமுறைகள் குறித்து எடுத்துக் கூறி விளக்கமளித்தனர்.