குத்துச்சண்டையில் வெண்கலம் வென்றார் பிரியா கங்காஸ்.. ஆசிய விளையாட்டில் சீன வீராங்கனையிடம் தோல்வி

குத்துச்சண்டையில் வெண்கலம் வென்றார் பிரியா கங்காஸ்.. ஆசிய விளையாட்டில் சீன வீராங்கனையிடம் தோல்வி

நகோயா: 2026 ஆசிய விளையாட்டுப் போட்டி குத்துச்சண்டையில், மகளிர் 60 கிலோ எடைப்பிரிவில் இந்திய வீராங்கனை பிரியா கங்காஸ் வெண்கலப் பதக்கம் வென்று அசத்தியுள்ளார். அனல் பறந்த அரையிறுதிப் போட்டியில் பலம் வாய்ந்த சீன வீராங்கனைக்கு எதிராக ஆக்ரோஷமாகப் போராடி, புள்ளிகள் அடிப்படையில் நூலிழையில் தோல்வியைத் தழுவினார்.

மகளிர் 60 கிலோ அரையிறுதிப் போட்டியில் இந்தியாவின் பிரியா கங்காஸ், சீனாவின் முன்னணி வீராங்கனையான யாங் செங்யுவை எதிர்கொண்டார். ஆட்டத்தின் முதல் சுற்றிலிருந்தே இருவரும் ஆக்ரோஷமாக குத்துகளை பரிமாறிக்கொண்டனர். கடைசி வினாடிகளில் இரு வீராங்கனைகளும் சரமாரியாக தாக்கினர். முதல் சுற்றின் முடிவில் நடுவர்கள் 3-2 என்ற கணக்கில் சீன வீராங்கனைக்கு சாதகமாக தீர்ப்பளித்தனர்.

2வது சுற்றிலும் பிரியா கங்காஸ் தீவிரமாகத் தாக்கினார். ஆனால் சீன வீராங்கனை நிதானமாக நின்று துல்லியமான குத்துகளை விட்டார். இதனால் 4 நடுவர்கள் சீன வீராங்கனைக்கு ஆதரவாக புள்ளிகளை வழங்கினர்.

வெற்றியை தீர்மானிக்கும் 3வது மற்றும் கடைசி சுற்றில் பிரியா கங்காஸ் அனைத்து பலத்தையும் திரட்டி சீறிப்பாய்ந்தார். ஆனால் சீன வீராங்கனை யாங் செங்யு பதற்றமடையாமல் தனது தற்காப்பு உத்தியைக் கையாண்டு புள்ளிகளை தற்காத்துக் கொண்டனர். இறுதியில் 1-4 என்ற புள்ளிக் கணக்கில் சீன வீராங்கனை வெற்றி பெற்றார். இறுதிப்போட்டிக்கு செல்லும் வாய்ப்பு பறிபோனாலும், அரையிறுதி வரை முன்னேறிய பிரியா கங்காஸ் வெண்கலப் பதக்கத்தை இந்தியாவுக்கு உறுதி செய்தார்.

முன்னதாக இந்தியா இன்று வில்வித்தையில் இரண்டு தங்கப் பதக்கங்களை வென்று இருந்தது குறிப்பிடத்தக்கது.