IND vs WI: இந்தியா தோற்க காரணமே இந்த சிஎஸ்கே பவுலர் தான்.. 47வது ஓவரில் கடைசி வாய்ப்பும் போச்சு

IND vs WI: இந்தியா தோற்க காரணமே இந்த சிஎஸ்கே பவுலர் தான்.. 47வது ஓவரில் கடைசி வாய்ப்பும் போச்சு

சண்டிகர்: இந்திய அணிக்கு எதிரான 3-வது ஒருநாள் போட்டியில் வெஸ்ட் இண்டீஸ் அணி 5 விக்கெட் வித்தியாசத்தில் அபார வெற்றி பெற்றது. கடைசி கட்டத்தில் வேகப்பந்து வீச்சாளர் அன்ஷுல் கம்போஜ் வாரி வழங்கிய ரன்களால் இந்திய அணி தோல்வியைத் தழுவியது. சிஎஸ்கே அணியில் இடம் பெற்று பிரபலமான அன்ஷுல் கம்போஜ் இந்தப் போட்டியில் தான் அறிமுகம் ஆனார். ஆனால், அவரது பந்துவீச்சு மிக மோசமாக அமைந்தது.

கடைசி 3 ஓவர்களில் வெஸ்ட் இண்டீஸ் வெற்றிக்கு 29 ரன்கள் தேவைப்பட்டது. இந்திய அணிக்கு வெற்றி வாய்ப்பு இருந்த சூழலில், 48-வது ஓவரை வீச அன்ஷுல் கம்போஜ் அழைக்கப்பட்டார். பவர்பிளே ஓவர்களிலேயே ரன்களை வாரி வழங்கியிருந்த இவர், இந்த 48-வது ஓவரில் மட்டும் 22 ரன்களை விட்டுக்கொடுத்து ஆட்டத்தின் போக்கையே தலைகீழாக மாற்றினார். அடுத்த ஓவரில் வெஸ்ட் இண்டீஸ் அணி எளிதாக வெற்றி பெற்றது.

இப்போட்டியில் அன்ஷுல் கம்போஜ் 9 ஓவர்கள் வீசி விக்கெட் ஏதுமின்றி 82 ரன்களை வாரி வழங்கினார். இறுதியில் வெஸ்ட் இண்டீஸ் அணி 48.2 ஓவர்களில் 5 விக்கெட்டுகளை மட்டும் இழந்து 352 ரன்கள் எடுத்து வெற்றி பெற்றது.

நியூ சண்டிகரில் நடைபெற்ற இப்போட்டியில் முதலில் பேட்டிங் செய்த இந்திய அணி 50 ஓவர்களில் 7 விக்கெட் இழப்பிற்கு 351 ரன்கள் குவித்தது. தொடக்கத்திலேயே சுப்மன் கில் 1 ரன்னிலும், விராட் கோலி ரன் ஏதுமின்றியும் ஆட்டமிழந்து அதிர்ச்சி அளித்தனர். பின்னர் ஜோடி சேர்ந்த ரோஹித் சர்மா 92 ரன்களும், ருதுராஜ் கெய்க்வாட் 57 ரன்களும் எடுத்து அணியைச் சரிவிலிருந்து மீட்டனர். அபாரமாக ஆடிய கே.எல்.ராகுல் 87 பந்துகளில் 10 பவுண்டரிகள், 6 சிக்சர்களுடன் 129 ரன்கள் குவித்து கடைசி வரை ஆட்டமிழக்காமல் களத்தில் இருந்தார்.

இதையடுத்து 352 ரன்கள் என்ற கடினமான இலக்குடன் களமிறங்கிய வெஸ்ட் இண்டீஸ் அணியில், தொடக்க வீரர் அமீர் ஜாங்கூ 67 ரன்கள் எடுத்தார். மறுமுனையில் நங்கூரம் போல் நிலைத்து நின்ற கேப்டன் ஷாய் ஹோப் 143 பந்துகளில் 17 பவுண்டரிகள், 3 சிக்சர்களுடன் 162 ரன்கள் விளாசி ஆட்டத்தை மாற்றினார். இந்தியா தோற்றாலும் 3 போட்டிகள் கொண்ட இத்தொடரை 2-1 என்ற கணக்கில் கைப்பற்றியது.