"ஷமி இல்லைனா இந்தியா உலகக்கோப்பை பைனலே போயிருக்காது.. அவருக்கு இடமில்லையா?”.. முகமது கைஃப் ஆவேசம்
"ஷமி இல்லைனா இந்தியா உலகக்கோப்பை பைனலே போயிருக்காது.. அவருக்கு இடமில்லையா?”.. முகமது கைஃப் ஆவேசம்
மும்பை: நியூசிலாந்து அணிக்கு எதிரான 2 போட்டிகள் கொண்ட டெஸ்ட் கிரிக்கெட் தொடரில் இருந்தும், ஒருநாள் அணியில் இருந்தும் மூத்த வேகப்பந்து வீச்சாளர் முகமது ஷமி திட்டமிட்டு புறக்கணிக்கப்பட்டுள்ளது பெரும் சர்ச்சையைக் கிளப்பியுள்ளது. உள்ளூர் ரஞ்சி கோப்பை தொடரில் டெல்லி அணிக்கு எதிராக 5 விக்கெட்டுகளை வீழ்த்தி ஃபார்மில் இருக்கும் முகமது ஷமியை முழுமையாகத் தவிர்த்துவிட்டு, இளம் பந்துவீச்சாளர்களான ஆகாஷ் தீப் மற்றும் அன்ஷுல் கம்போஜை தேர்வுக்குழு தேர்வு செய்துள்ளது இந்திய கிரிக்கெட் வட்டாரத்தில் பெரும் புயலைக் கிளப்பியுள்ளது.
இந்த விவகாரத்தில் பிசிசிஐயின் அணுகுமுறையை இந்திய அணியின் முன்னாள் வீரர் முகமது கைஃப் கடுமையாக விமர்சனம் செய்துள்ளார். "இப்போதெல்லாம் சீனியர் வீரர்களை அணியில் இருந்து நீக்கும் போது நிர்வாகம் நேருக்கு நேராக எதுவும் பேசுவதில்லை. இ-மெயிலில் ஒரு பட்டியலை அனுப்பிவிட்டு நழுவிக் கொள்கிறார்கள். செய்தியாளர் சந்திப்போ, கேள்விகளுக்குப் பதிலளிக்கும் வெளிப்படைத்தன்மையோ இங்கு கிடையாது. முகமது ஷமி போன்ற ஒரு உலகக் கோப்பை நாயகனை ஓரங்கட்டும்போது பிசிசிஐ உரிய விளக்கம் அளிக்க வேண்டாமா? 2023 ஒருநாள் உலகக் கோப்பையில் ஷமி மட்டும் ஆடவில்லை என்றால் இந்தியா இறுதிப் போட்டிக்குக் கூட சென்றிருக்க முடியாது" என்று கைஃப் ஆவேசப்பட்டார்.
ஷமியால் நீண்ட ஓவர்கள் தொடர்ந்து வீச முடியாது என்ற வாதத்திற்குப் பதிலடி தந்த கைஃப், "ஜஸ்பிரித் பும்ராவும் கூட தொடர்ச்சியாக நீண்ட ஓவர்கள் வீசுவதில்லை; அவரும் சிறிய ஸ்பெல்களில்தான் பந்துவீசுகிறார். இங்கிலாந்தில் பும்ராவின் பணிச்சுமையைக் குறைக்க சுப்மன் கில் அப்படித்தான் கையாண்டார். பும்ராவுக்குப் பொருந்தும் ஒரு வழிமுறை ஷமிக்கு ஏன் பொருந்தாது? குறுகிய ஓவர்களிலேயே எதிரணியை நிலைகுலைய வைக்கும் வல்லமை ஷமிக்கு உண்டு" என்று சுட்டிக்காட்டினார்.
மேலும் பேசிய கைஃப், "எந்தப் பந்துவீச்சாளரை எதிர்கொள்ள அச்சம் என்று நியூசிலாந்து பேட்டர்களிடம் கேட்டுப் பாருங்கள்; அவர்கள் முதலில் சொல்லும் பெயர் ஷமியாகத்தான் இருக்கும். 2023 உலகக் கோப்பையில் தர்மசாலா மற்றும் வான்கடே அரையிறுதியில் நியூசிலாந்தை ஒற்றை ஆளாக வதம் செய்தவர் அவர். ஷமி வரவில்லை என்ற தகவல் நிச்சயம் நியூசிலாந்து வீரர்களுக்குப் பெருமூச்சைத் தரும்" என்றார். கடந்த 2025 சாம்பியன்ஸ் டிராபி இறுதிப் போட்டிக்குப் பிறகு ஷமி ஓரங்கட்டப்பட்டு வருவது நியாயமற்றது என்றும் அவர் குறிப்பிட்டார்.