இவை தான் உண்மைகள் எலான் மஸ்க்; இந்தியாவின் சாதனைகளை பட்டியலிட்டு ஸ்ரீதர் வேம்பு பதிலடி

புதுடில்லி: இந்தியாவின் 'நிஜ பாஸ்' முகேஷ் அம்பானி தான் என டெஸ்லா மற்றும் ஸ்பேஸ்எக்ஸ் நிறுவனத் தலைவர் எலான் மஸ்க் கூறியதற்கு, இந்தியாவின் சாதனைகளை பட்டியலிட்டு ஸோகோ நிறுவனத்தின் நிறுவனர் ஸ்ரீதர் வேம்பு தெரிவித்துள்ளார்.

அவரது பதிவு: உலகிலேயே மிகக் குறைந்த விலையில் டேட்டா கிடைக்கும் நாடுகளில் இந்தியாவும் ஒன்றாகும். அது மிகவும் சிறப்பாக இருப்பதால், நான் இந்தியாவில் பயணம் செய்யும்போது உள்ளூர் வைபையுடன் இணைக்கக் கூட வேண்டியதில்லை.

என் கணினியில் வேலை செய்வதற்காக என் மொபைல் போன் டேட்டாவை பயன்படுத்தி கொள்கிறேன்.

இந்தியர்கள் வழக்கமாக அதிக டேட்டா பிளான் உடன் இரண்டு சிம் கொண்ட மொபைல்போன் பயன் படுத்துகிறார்கள், ஏனெனில் அவை மிகவும் மலிவானவை. இந்தியர்கள் அனுபவிக்கும் குறைந்த டேட்டா விலைகளுக்கு அம்பானியின் ஜியோ அறிமுகமே முக்கிய காரணமாகும். உலகிலேயே மிகக் குறைந்த விலைகளில் மருந்துகள் கிடைக்கும் நாடுகளில் இந்தியாவும் ஒன்றாகும்; இந்தியாவிற்கு வரும் மக்கள் இப்போது வழக்கமாக மருந்துகளை வாங்கி வீட்டிற்கு எடுத்துச் செல்கிறார்கள்.

யுபிஐ மூலம் பணம் செலுத்தும் முறைகளில், உலகிலேயே மிகக் குறைந்த கட்டண முறைகளில் இந்தியாவும் ஒன்றாகும். மறுபுறம், அமெரிக்க சந்தையில் சீனாவின் போட்டியிலிருந்து டெஸ்லா பாதுகாக்கப் படுவதால், மற்ற இடங்களை விட அமெரிக்காவில் மின்சார வாகனங்களின் விலை அதிகமாக உள்ளது.

சராசரி இந்தியருக்குப் பலன்கள் சென்றடையும் வகையில், ஒரு போட்டித்தன்மை வாய்ந்த பொருளாதாரத்தை உருவாக்க பிரதமர் மோடி கடுமையாக உழைத்துள்ளார். அவரது அரசு ஏகபோகங்களைச் சகித்துக்கொள்வதில்லை. அவர் ஸ்டார்ட்அப் நிறுவனங்களின் மிகப்பெரிய எழுச்சியைத் தீவிரமாக ஊக்குவித்துள்ளார்.

அதுவே மிகவும் போட்டித்தன்மை வாய்ந்த பொருளாதாரத்தின் சிறந்த அறிகுறியாகும். மோடி அரசின் கொள்கையின் நேரடி விளைவாக, இந்திய ஸ்டார்ட்அப் நிறுவனங்கள் குறைந்த விலை ராக்கெட் தயார் செய்வதில் பெரும் முன்னேற்றம் கண்டு வருகின்றன. இது ஸ்பேஸ்எக்ஸுக்கு ஓர் அச்சுறுத்தலாக விளங்குகிறது. இதேபோலத்தான் சீன மின்சார வாகனங்கள் டெஸ்லாவுக்கு அச்சுறுத்தலாக உள்ளன. இவைதான் உண்மைகள், எலான். இவ்வாறு ஸ்ரீதர் வேம்பு கூறியுள்ளார்.