ஐபிஎல் மெகா டீல்.. DC அணியை விட்டு சன்ரைசர்ஸ் அணிக்கே திரும்பிய நடராஜன்.. ஆனால் சம்பளம் ‘கட்’

ஐபிஎல் மெகா டீல்.. DC அணியை விட்டு சன்ரைசர்ஸ் அணிக்கே திரும்பிய நடராஜன்.. ஆனால் சம்பளம் ‘கட்’

ஹைதராபாத்: ஐபிஎல் தொடரில் டெல்லி கேபிடல்ஸ் அணியில் இருந்து தனது பழைய அணியான சன்ரைசர்ஸ் ஹைதராபாத் அணிக்கு தமிழக வேகப்பந்து வீச்சாளர் டி.நடராஜன் அதிகாரப்பூர்வமாக வர்த்தக முறையில் திரும்பியுள்ளார். சன்ரைசர்ஸ் அணிக்காக மீண்டும் விளையாட வேண்டும் என்பதற்காக நடராஜன் தனது சம்பளத் தொகையை பெருமளவு குறைத்துக் கொண்டுள்ளார்.

கடந்த 2025 ஐபிஎல் ஏலத்தில் டெல்லி கேபிடல்ஸ் அணி இவரை 10.75 கோடி ரூபாய்க்கு வாங்கியது. ஆனால் தற்போது சன்ரைசர்ஸ் அணிக்குத் திரும்புவதற்காக தனது சம்பளத்தை பாதியாகக் குறைத்து, 5 கோடி ரூபாய் என்ற திருத்தப்பட்ட சம்பளத்துடன் ஒப்பந்தமாகியுள்ளார். அதேவேளையில் சன்ரைசர்ஸ் அணியில் இருந்த 26 வயது சுழற்பந்து வீச்சாளர் ஜீஷன் அன்சாரி, தனது வழக்கமான தொகையான 40 லட்சம் ரூபாய்க்கு டெல்லி கேபிடல்ஸ் அணிக்கு மாற்றப்பட்டுள்ளார்.

கடந்த 2020 முதல் 2024 வரை 5 சீசன்களாக சன்ரைசர்ஸ் அணியின் முக்கியத் வேகப் பந்துவீச்சாளராக விளங்கியவர் நடராஜன். டெத் ஓவர்களில் துல்லியமாக யார்க்கர் வீசி எதிரணிகளை தவிக்க விடுவதில் கைதேர்ந்தவர். குறிப்பாக 2024 சீசனில் 19 விக்கெட்டுகளை வீழ்த்தி சன்ரைசர்ஸ் அணி இறுதிப்போட்டி வரை முன்னேற முக்கியப் பங்காற்றினார். 35 வயதான இவர் 73 ஐபிஎல் போட்டிகளில் விளையாடி 72 விக்கெட்டுகளைக் கைப்பற்றியுள்ளார்.

மறுபுறம் டெல்லி அணி தங்களது முதன்மை சுழற்பந்து வீச்சாளரான குல்தீப் யாதவை லக்னோ சூப்பர் ஜெயண்ட்ஸ் அணிக்கு வர்த்தக முறையில் மாற்றியிருந்தது. இதனால் ஏற்பட்ட வெற்றிடத்தை நிரப்பவே, ஐபிஎல் 2025-ல் 10 போட்டிகளில் ஆடிய இளம் சுழற்பந்து வீச்சாளர் ஜீஷன் அன்சாரியை டெல்லி நிர்வாகம் தனது அணியில் சேர்த்துள்ளது.

சன்ரைசர்ஸ் அணிக்கு டெத் ஓவர் ஸ்பெஷலிஸ்ட்டான நடராஜனும், டெல்லி அணிக்கு திறமையான இளம் சுழற்பந்து வீச்சாளரும் கிடைத்திருப்பதால் இந்த வீரர் பரிமாற்றம் இரு அணிகளுக்குமே வெற்றிகரமாக அமைந்துள்ளது.

எனினும், தனிப்பட்ட முறையில் நடராஜனுக்கு சுமார் 5.75 கோடி ரூபாய் வருவாய் இழப்பு ஏற்பட்டுள்ளது. அவர் தனது முந்தைய ஏலத் தொகையான 10.75 கோடி என்பதில் இருந்து 5 கோடியாக சம்பளத்தை குறைத்து இருப்பதால் இந்த நிலை ஏற்பட்டுள்ளது. இது சன்ரைசர்ஸ் ஹைதராபாத் அணிக்கு ஏலத்தில் கூடுதல் கையிருப்பை அளிக்கும்.