'பணமா? ரூ.50, UPI பேமென்டா? ரூ.51' - எஸ்கேப் ரூட்டில் வியாபாரிகள்; MDR

'பணமா? ரூ.50, UPI பேமென்டா? ரூ.51' - எஸ்கேப் ரூட்டில் வியாபாரிகள்; MDR-ல் மாட்டும் கஸ்டமர்கள்?

புதிய UPI MDR கட்டணத்தால் வியாபாரிகள் கவலை தெரிவித்துள்ளனர். காசியாபாத் கடைகளில் பணமாக செலுத்துமாறு வாடிக்கையாளர்களுக்கு அறிவுறுத்தப்படுகிறது.

உத்தரப்பிரதேசத்தின் காசிபாத் கடை வாசல்களில் கடந்த வார இறுதியில் சில நோட்டீஸ்கள் தொங்கியிருந்தன.

‘UPI பேமென்ட்கள் இங்கு கூடாது’.

‘பானிபூரி: பணம் - ரூ.50; UPI - 51’.

இது MDR அறிமுகப்படுத்தியதும் எதிர்பார்த்த ஒன்றுதான்.

Merchant Discount Rate - இதை அக்டோபர் 15-ஆம் தேதி முதல், இந்தியா முழுவதும் மத்திய அரசு அமல்படுத்தியுள்ளது.

இதன் படி, மாதம் ரூ.1 லட்சத்திற்கு மேல் UPI பேமென்ட் பெறும் வியாபாரிகளுக்கு, அவர்கள் பெறும் ஒவ்வொரு பேமென்டிற்கும் 0.4 சதவீதம் கட்டணமாகப் பிடிக்கப்படுவதுதான் MDR.

மத்திய அரசு கூறியதன் படி, ரூ.2,000-க்கும் குறைவான பேமென்ட்கள், மாதத்திற்கு ரூ.1 லட்சத்திற்கும் குறைவாக UPI பேமென்ட் பெறும் வியாபாரிகள், இரண்டு தனிநபர்களுக்கு இடையே நடக்கும் பரிவர்த்தனைகளுக்கு இந்தக் கட்டணம் கிடையாது.

MDR என்பது மத்திய அரசு வசூலிக்கும் வரியோ, கட்டணமோ இல்லை. அது UPI பேமென்டை எளிமைப்படுத்தும் வங்கிகள், பேமென்ட் சேவை வழங்குநர்களுக்கான கட்டணம் என்று விளக்கப்பட்டுள்ளது.

மிக முக்கியமாக, இந்தக் கட்டணத்தை வியாபாரிகள், பிசினஸ்கள் கஸ்டமர்களிடமிருந்து பெறக்கூடாது. தாங்கள்தான் கட்ட வேண்டும். இது சரியாக நடக்கிறதா என்பதை வங்கிகள் கண்காணிக்கும் என்றும் மத்திய அரசு தெரிவித்திருந்தது.

என்ன பிரச்னை?

இந்த MDR-ஐ அறிமுகப்படுத்தியதுமே இந்தக் கட்டணம் கஸ்டமர்களின் தலையில்தான் விழும் என்று பல எதிர்ப்புகள் எழுந்தன.

ஆனால், அப்படி நடக்காது என்று மத்திய அரசு எவ்வளவோ சாதித்தது.

ஆனால், இப்போது என்ன நடக்கும் என்று காசிபாத் கடைகள் இந்தியாவிற்குப் பாடம் எடுத்துவிட்டது.

நேற்று காசிபாத்தில் தொங்கிய நோட்டீஸ்கள், இன்று இந்தியா முழுக்கப் பரவலாம்.

பெரிய பெரிய தொகைகள் ஒரே கணக்கிற்கு வந்தும், சரியான வருமான வரிக் கட்டாத பலர் இந்த MDR மூலம் சிக்கலாம். UPI சேவை வழங்குநர்களுக்கு இது சரியான கட்டணத்தைச் சென்று சேர்க்கும் என்று MDR-ஐ சரி என்று நிரூபிக்க 1008 காரணங்கள் சொல்லலாம்.

எந்தவொரு வியாபாரியும், பிசினஸும் இந்தக் கட்டணத்தை ஏற்கத் தயாராக இருக்காது. இதனால், பணப் பரிவர்த்தனைகள் மீண்டும் அதிகமாகும்.

மெல்ல மெல்லத் தொடங்கி ஸ்டெடியான டிஜிட்டல் இந்தியா இப்போது காணாமல் கூடப் போகலாம்.

காணாமல் போகும் டிஜிட்டல் இந்தியா?

பணப் பரிவர்த்தனைகள் அதிகமாகும்போது, எந்தக் கருப்புப் பணம், ஊழல், லஞ்சம் என்று டிஜிட்டல் இந்தியா அறிமுகப்படுத்தப்பட்டதோ, அந்த இலக்கே இல்லாமல் போகலாம்.

இதையும் மீறி UPI பேமென்ட்கள் நடந்தால், அந்தக் கட்டணம் நிச்சயம் கஸ்டமர்களிடம்தான் வசூலிக்கப்படும். இதற்குக் காசிபாத் தான் நல்ல உதாரணம்.

வியாபாரி எப்போதுமே பணம் விஷயத்தில் வியாபாரியாகத்தான் இருப்பார்... அப்படி தான் அவர்கள் இருக்க முடியும்.

இந்த மாதிரியான நடைமுறைகளில் அரசாங்கம் அரசாங்கமாகவே இருக்கும்.

சரியான நடைமுறை, நடவடிக்கை இல்லாமல் அமல்படுத்தப்படும் மாற்றங்களில் கடைசியில் பாதிக்கப்படுவது என்னவோ கஸ்டமர்கள்தான்.!