சபலென்காவின் ஹாட்ரிக் கனவு சுக்குநூறு.. அமெரிக்க ஓபன் பட்டம் வென்று எலினா ரைபாகினா வரலாற்று சாதனை

சபலென்காவின் ஹாட்ரிக் கனவு சுக்குநூறு.. அமெரிக்க ஓபன் பட்டம் வென்று எலினா ரைபாகினா வரலாற்று சாதனை

நியூயார்க்: அமெரிக்காவின் நியூயார்க் நகரில் நடைபெற்ற அமெரிக்க ஓபன் டென்னிஸ் தொடரின் மகளிர் ஒற்றையர் இறுதிப் போட்டியில், நடப்பு சாம்பியன் அரினா சபலென்காவை வீழ்த்தி கஜகஸ்தானின் எலினா ரைபாகினா தனது முதல் அமெரிக்க ஓபன் சாம்பியன் பட்டத்தை வென்று வரலாற்றுச் சாதனை படைத்துள்ளார்.

அனல் பறந்த இந்த இறுதி ஆட்டத்தில், உலகின் நம்பர் 1 வீராங்கனையான எலினா ரைபாகினா, பெலாரஸின் அரினா சபலென்காவை எதிர்கொண்டார். 2 மணி நேரம் 21 நிமிடங்கள் நீடித்த இந்த விறுவிறுப்பான போட்டியில், அபாரமாக விளையாடிய ரைபாகினா 6-4, 5-7, 6-2 என்ற செட் கணக்கில் சபலென்காவை வீழ்த்தி சாம்பியன் கோப்பையைக் கைப்பற்றினார்.

முதல் செட்டை 6-4 என ரைபாகினா கைப்பற்றிய நிலையில், இரண்டாவது செட்டில் சபலென்கா ஆக்ரோஷமாகப் போராடி 7-5 என வென்று ஆட்டத்தை சமன் செய்தார். ஆனால், வெற்றியாளரைத் தீர்மானிக்கும் 3-வது செட்டில் தனது அசுர வேக சர்வீஸ்களால் ஆதிக்கம் செலுத்திய ரைபாகினா, சபலென்காவின் சர்வீஸ்களை அடுத்தடுத்து முறியடித்து 6-2 என எளிதாக செட்டைக் கைப்பற்றினார். சாம்பியன்ஷிப் புள்ளியில் ஒரு துல்லியமான ஏஸ் சர்வீஸ் அடித்து வெற்றியை உறுதி செய்தார்.

இந்த அதிர்ச்சித் தோல்வியின் மூலம் தொடர்ச்சியாக 3 முறை அமெரிக்க ஓபன் பட்டம் வென்று 'ஹாட்ரிக்' சாதனை படைக்க வேண்டும் என்ற சபலென்காவின் நீண்ட நாள் கனவு தகர்ந்தது. இதனால் மிகுந்த ஏமாற்றமடைந்த சபலென்கா, தனது ராக்கெட்டை மைதானத்தில் அடித்து உடைத்து தனது கோபத்தை வெளிப்படுத்தினார்.

தனது கேரியரில் 3-வது கிராண்ட்ஸ்லாம் பட்டத்தை வென்றுள்ள ரைபாகினா, நடப்பு 2026 சீசனில் ஆஸ்திரேலிய ஓபனைத் தொடர்ந்து 2-வது கிராண்ட்ஸ்லாம் பட்டத்தைக் கைப்பற்றி மகளிர் டென்னிஸ் உலகில் தனது அசைக்க முடியாத ஆதிக்கத்தை நிலைநாட்டியுள்ளார். பிரெஞ்சு ஓபன் தவிர மற்ற 3 முக்கிய கிராண்ட்ஸ்லாம் பட்டங்களையும் இவர் வென்றுள்ளது குறிப்பிடத்தக்கது.